星期五晚去咗睇田蕊妮個人演唱會，好少睇演唱會時，會忍唔住睇到眼濕濕。
演唱會上，除咗唱歌，重有阿田嘅心路歷程，開場就係佢爸爸唱歌，之後有提到母親嘅故事，還有佢老公嘅深情剖白。由阿田參加亞視嘅「未來偶像爭霸戰」攞冠軍，到佢16歲時，喺維園出席個五台同播嘅大型倒數活動，同場有四大天王，有王菲。本來阿田當年第一次出大騷，非常期待。點知主持人介紹佢出場時，一提到亞視，全場立即噓聲四起。
阿田話，當時嚇到手震，但回頭一望，卻見母親已經哭成淚人。母親喊，唔係因為阿女做錯事，只係心痛阿女。阿田唱著當年同一首歌，《那一場風花雪月的事》，相隔多年，今次唱完，全場就掌聲雷動。我當時幻想像，如果佢媽媽睇到呢個場景，應該會好開心欣慰。
田蕊妮呢個人，真係好努力，好認真。
注一：當時我在觀眾席，坐咗喺洪永城同黎洛懿兩個型男旁邊，啲娛樂版記者係咁影佢哋，好似影埋我，啲閃光燈爆到嚇屎人，我忍唔住自動彈開，希望唔會喺娛樂版見到我。
注二：呢張相喺用 iPhone 影，雖然我聽聞有個老細話 iPhone 影相真係垃 L 圾，但 sorry，其實現場燈光個 contrast 太大，不妨相機個曝光調暗少少，之後再用 Lightroom 執番光佢，個效果不完美但可接受。
Kristal Tin
Search